Li Tirkiyê bihayê derman %37 hat zêdekirin
Saziya Amûrên Pizîşkî û Derman a Tirkiyê (TİTCK), nirxê yek euroyê ku bo diyarkirina bihayên derman tê hesabkirin ji 4,57 lîreyan bo 6,29 hat zêdekirin.
Saziya Amûrên Pizîşkî û Derman a Tirkiyê, nirxê euro bo diyarkirina bihayên derman guherand. Nirxê her euroyekî ji bo sala 2022an ji 4,57 lîreyan bo 6,29 hat zêdekirin û bi vî awayî bihayê derman ji sedî 37 zêde bû.
Biryara bihabûna derman, dê 5 rojên din bikeve warê cîbicîkirinê.
Parlamenterê CHPê yê Mereşê Mehmet Goker piştî biryara zêdekirina bihayên derman ragihand, ku bihayên derman %37,43 hatiye zêdekirin.
Li Tirkiyê, demeke pirsgirêka peydakirina dermanan heye û bi taybetî dermanên tên hawirdekirin gelek derman nayên peydakirin. Tê gotin, xwediyên kompanyayên dermanan ji ber ku çaverê dikirin ku dê bihayên derman bên zêdekirin, dermanên di mexzenan de nedifirotin bazarê.
