Amed; Di 5 salan de 58 penêrfiroşan dikanên xwe girtin
Li Sûka Penêrfiroşan a navçeya Sûrê di 5 salên dawîn de 58 penêrfiroşan dikanên xwe girtine. Penêrfiroşan, destnîşan kir ku bi krîza aborî û pandemiyê re karê wan hatiye asta rawestandinê û gotin ku tehma sûkê nemaye.
Li gorî rapora ajansa nûçeyan a Mezopotamyayê (MA), Li Amedê, ji ber kirîza aborî her roj dikanên nû li dikanên ku tên girtin zêde dibin. Li gorî daneyên Yekitiya Odeyên Pîşekar û Esnafan a Amedê, di 6 mehên destpêkê yên sala 2019’an de li bajêr 912 dikan hatine girtin. Dîsa ji 6 mehên dawîn ên heman salê û heta niha 890 dikanên din jî hatine girtin.
Herî zêde jî dikan li Sûka Penêrfiroşan a li navçeya dîrokî Sûrê hatine girtin. Sûka ku berê 84 dikan lê hebûn, di 5 salên dawîn de ji ber kirîza aborî, qedexeyên derketina derve û pandemiyê 58 dikan lê hatine girtin tenê mane 26 dikan.
JI HER DERA WELAT RE penîr DIŞÎNIN
Esnaf Lokman Yaşar ku 20 sal in li sûkê penîr difiroşe, diyar kir ku bi qedexeyên derketina derve yên sala 2015’ân re girtina dikanan dest pê kiriye û wiha gotg: “Bi kûrbûna kirîza aborî re girtina dikana zêde bû. Li gel ku demeke dirêj bihayê penîr naguhere jî kes zêde nayê nakire. penîr ji gundên Farqîn, Çinar û Erxenê tê sûkê. Bihayê kiloya penîr di navbera 20-35’an de diguhere. Em penîrê li vir ji her dera welat re dişînin. Berhemên me xwezayî û xweş in.”
TEMA SÛKÊ NEMAYE!
Esnaf Besrî Yenîş jî ku ji kêmbûna karê wan gazinan dikir, da zanîn ku tema sûka penîrfiroşan nameye û ev tişt anî ziman: “Ji bo debara xwe em vî karî didomînin. Li her cihê penîr tê firotin, lê kalîteya penîrê me cuda ye. penîrê li vir ne berhemê kargehê ye. Niha piraniya mirovan tenê kîlokî 2 kîlo dikirin. Berê em ji firotina penîr nikaribûn bisekinin. Lê niha ji 2 saetan carekê ancax bikerek tê. Kar êdî nemaye.”
BANDORA PANDEMIYÊ
Esnafê bi navê Lokman Aydar jî, bi lêv kir ku bi destpêkirina pandemiyê re karê wan hatiye asta rawestandinê û wiha axivî: “Ji bo ku liv û tevgera li sûkê zêde bibe divê sûk bê sererastkirin. Sozên ku berê hatin dayîn bi cih nehatin. Dikan bûne mîna hêlinên çukan. Ji ber bûyeran nêzî 6 mehan dikan nehatin vekirin û heta salekê kes nehat dikanan. Xesara me ya van deman nehat bersivandin. Bi pandemiyê re karê me sekiniye. Hêza kirînê kêm bûye. Berê bikerekî ku bi 100 TL’yî 5 kîlo penîr bikiriya niha dikare tenê 3 kîlo penîr bikire. Her gav û saet zem çêdibin.”
