Wezareta Tendirustiya Filistînê li Xezzê ragihand ku ji dema destpêbûna şerrê dijî Xezzê ve di 7`ê Cotmeha 2023`an de heta nika, hejmara şehîdên Zîvala Xezzê gihîştiye 73 hezar û 786 kesî û hejmara birîndaran jî rabûye 174 hezar û 771 kesî.

Wezareta Tendirustiya Filistînê li Xezzê ragihand ku di encama êrişên 24 saetên buhurî yên Rejîma Siyonîst ser navçeyên curbicur ên Xezzê de du filistînî hatine şehîdkirin û 25 kes jî birîndar bûne û bi vî awayî hejmara şehîdên êrişên Rejîma Siyonîst di nêzî 3 salên buhurî de rabûye 73 hezar û 786 kesî.
Li dû êrişên Rejîma Siyonîst ji 11`ê Cotmeha 2025`an ve heta nika hezar û 372 filistînî hatine şehîdkirin û 4 hezar û 659 kes jî birîndar bûne. Ji bilî kesên ku hatine kuştin yan birîndarkirin ku para zêde ya wan jin û zarok in, Rejîma Siyonîst nêzî sedî 90`ê binesaziyên sivîl ên Zîvala Xezzê kawil kirine. NY jî xercê ji nû ve avakirina vê navçeyê nêzî 70 Mîlyard Dolar texmîn kiriye.
Êrişên Rejîma Siyonîst ser navçeyên başûrê Libnanê jî berdewam in û sibeha îro navçeyên Nebetiye Fewqa û Kefer Tebenîtê dan ber bombeyan û bajaroka Zoter a Rojhilat dan ber êrişên bi hawanan. Balafirên cengê yên Rejîma Siyonîst herwiha bilindahiyên Elî El Tahirê li dorhêla Nebetiye Fewqayê dan ber bombeyan.