Gotinên li ser diyarbûna berendamê kurdan ji bo serokomartiya Iraqê
Endamekî Partiya Demokrat a Kurdistana Iraqê (PDK) qala diyarbûna berendamê partiyên kurd ên vî welatî ji bo serokomartiyê kir.
Li gorî rapora roja Duşemiyê ya malpera Middle East Newsê, Elî Feylî, endamê Partiya Demokrat a Kurdistana Iraqê (PDK) got: Di roja dawiyê ya gotûbêjan da biryar hat dayîn ku di hevdîtina navbera Mesûd Barzanî serokê Partiya Demokrat a Kurdistana Iraqê (PDK) û Bafil Talebanî serokê Yekîtiya Niştîmanî ya Kurdistana Iraqê (YNK) da, berendamê dawiyê ji bo serokomartiyê were nasandin, lê ev hevdîtin li ser daxwaza YNK'yê hatiye paşdaxistin.
Feylî got: Kurdên Iraqê derbarê hebûna li Parlimana Iraqê bi berendamekî ji bo serokomartiyê hevdeng in û lihevkirinên di vî warî da hema bêje gihîştine qonaxa dawiyê û heta navê berendamê dawiyê jî diyar bûye, lê ji ber rewşa siyasî ya li welêt, carê dê bi awayê fermî neyê ragihandin.
Feylî tekez kir: Beşek ji meseleyê girêdayî bi hewildanên ji bo şandina taximeke hevpar bo hevdîtina bi Muqteda Sedir ra ye.
Vî endamê Partiya Demokrat a Kurdistana Iraqê (PDK) her wiha got: Muhemed Şiya' El-Sûdanî berendamê Çarçoveya Hevahengiya Şîeyên Iraqê ji bo serokwezîrtiyê kesayetiyekî nasyar e ku kêşeya tu kesî pê ra tune û kêşe di navbera Çarçoveya Hevahengiyê û Tevgera Sedir da ye.
