Li navçeya Qamuşan a ser bi parêzgeha Qersê lehî rabû
Li navçeya Qamuşan a ser bi parêzgeha Qersê ya Tirkiyê di encama rabûna lehiyê de beşeke ajel û otomobîlên welatiyan ji nav çûn û avê da çendîn xaniyan.
Li gundên Înkaya û Topkaya yên ser bi navçeya Qamuşan a girêdayî parêzgeha Qersê, duh 14ê Tebaxa 2021ê di demjimêrên nîvro de baraneke zêde barî û di encamê de lehî rabû.
Li gor agahiyan di encama wê lehiyê de beşek zêde ya ajelên gundiyan ji nav çûn û lehiyê çendîn otomobîlên welatiyan li ber xwe birin. Herwiha di encama lehiyê de avê da beşeke xaniyên welatiyan jî.
Li ser agahdarkirina welatiyan tîmên Rêveberiya Rewşên Bilez û Karesatan, Tîmên Tendirustî û Jendermeyan bo wan cihên lehiyê hatin şandin.
Qeymeqamê navçeya Qamuşanê Recep Koşal jî derbarê lehiya ku li navçeyê rabûye daxuyaniyek nivîskî belav kir.
Recep Koşal di daxuyaniya xwe de got : “Li gundê Înkaya yê navçeya me di 14ê Tebaxa 2021ê piştî barîna baraneke zêde lehî rabû û lehiyê zererek maddi gehandiye xanî, otomobil û ajelên welatiyên me. Ziyanên canî nîn in. Tîmên Rêveberiya Rewşên Bilez û Karesatan, Rêveberiya Taybet û Jendermeyan bo cihên lehiyê hatine şandin û dest bi alîkariya welatiyan û tespîtkirina ziyanan hatiye kirin.”
