Balafira Rûsyayê li Gumguma Tirkiyê kete erdê
Li parêzgeha Gumgum (Meraş) a kurdên Tirkiyê balafira Rûsî ya agirvemirandinê ket. Wezareta Berevaniya Rûsyayê ragihand 8 lêniştiyên wê ku 5 ji wan ji Rûsyayê û 3 jî ji Tirkiyê bûn jiyana xwe ji dest dane.
Balafira ku Wezareta Çandinî û Daristanan a Tirkiyê ji Rûsyayê kirê girtibû di dema hewla vemirandina agirê li navçeya Onikişubat a Gumgumê ket xwarê.
Li gor agahiyên berdest piştî ketina wê balafirê gelek tîmên hawarçûnê bo cihê bûyerê hatine şandin.
Parêzgarê Mereşê Omer Faruk Coşkun jî li ser ketina firokeya agirvenmirandinê daxuyaniyek da û got “Li taxa Ilica, li devera Almali ya ser bi navçeya Onikişubatê ji ber vedana brûskê agir derket, me hem bi bejayî û hem jî bi hewayî hewl da wî agirî vemirînin. Ji bo vê yekê jî me balafirek şandibû navçeyê, lê piştî demekê ti agahiyeke me ji wê firokeyê bi dest neket pişt re em pêhesiyan ew ketiye erdê.. Me gelek tîm şandine devera ku balafir lê ketiye.”
Coşkun derbarê cihê balafir lê ketiye jî got: "Balafir li Geliyê Kisikê yê ser Taxa Beşenê ye ket. Niha mimkun nîne ku der barê muretebatê de tişteke teqez bê gotin ."
Ji aliyê din ve derbarê ketina balafirê de Wezareta Berevaniya Rûsyayê di daxuyaniyekê de ragihand ku 5 welatiyên Rûs û 3 welatiyên Tirk ên di balafirê de jiyana xwe ji dest dane.
Ketina balafira agirvemirandinê di demekê de ye ku ji 28ê Tîrmeha 2021ê ve bo demê 13 rojan agir bi 157 daristanên Tirkiyê ketiye û bûye sedema şewitîna nêzîkî 200 hezar hektarên zeviyê.
