Bulent Arinç dest ji kar berda
Endamê Komîteya Şêwirmendî ya Bilind a Serokomariya Tirkiyê Bulent Arinç dest ji kar berda. Di van rojên dawiyê de, li ser mijara girtina Demirtaş û hitmala azadkirina wî de, nakokî ketibû navbera Arinç û Erdogan.
Endamê Komîteya Şêwirmendî ya Bilind a Serokomariya Tirkiyê Bulent Arinç li ser Twîtterê daxuyaniya xwe ya desjikarbendanê belav kir.
Bulent Arinç diyar kir ku gotinên wî yên derbarê hevserokê giştî yê Partiya Demokratîk a Gelan (HDP) yê berê Selahattin Demîrtaş û karsaz Kavala de ku niha herdu jî di girtîgehê de ne hatine berevajokirin û bûne cihê gengeşeyan.
Arinç destnîşan kir ku nama desjikarberdana xwe pêşkeşî Serokomarê Tirkiyê Receb Teyib Erdogan kiriye û wî jî pejirandiye.
Herwiha Serokatiya Ragihandinê ya Serokomariyê piştrast kir ku Bulent Arinç îstîfaya xwe daye Erdogan û wî jî îstîfaya Arinç qebûl kiriye.
Pêştir Bulent Arinç ku yek ji damezrînerên AKPê ye di dema beşdariya xwe ya di bernameyeke televîzyonî de, behsa dosya derbarê Demîrtaş û Kaval de kiribû û gotibû divê bêne berdan.
Derbarê pirsa Kurd de jî Arinç gotibû, “Yek ji mezlûmên vî welatî Kurd in. Bûyerên sala 1980an li Zindana Amedê, paşê divê em hemû ji çîrokên “Devran” bixwînin. Di proseya çareseriyê de hinek kes hatibûn berdan. Dibe ev jî bê berdan. Divê dadgeh, dadger azadîxwaz bifikirin.”
Erdogan li ser gotinên Bulent Arinç ên derbarê Kavala û Demîrtaş de axivîbû û gotibû, ew gotinên wî yên şexsî ne û nabe bi “Serokomar, hikûmet û partiya me bên têkildarkirin” û gotibû, “Em ti caran bi kesên wek Kavala re li gel hev nabin” û amaje bi bûyerên Kobaniyê yên sala 2014an kir û diyar kir, “Em Kobaniyê jibîr nakin!”
