Li Geverê di encama êrişa PKKê de 7 leşkerên Tirkiyê hatin kuştin
Şervanên PKKê li Geverê li dijî artêşa Tirkiyê ku operasyonek da bû despêkirin, êrişek pêk anî ku di encamê de 7 leşkerên artêşa Tirkiyê hatin kuştin ku yek ji wan payebilind bû.
PKKê bi weşandina daxuyaniyekê diyar kir ku 13'ê Îlonê artêşa Tirkiyê li bejahiya bajarokê Bajêrganê yê navça Gevera Colemêrgê li derdora gundên Kelê, Nebar, Xurakana Jêr û Xurakana Jor dest bi operasyonê kir. Di dema operasyonê de di navbera PKKê û Artêşa Tirkiyê şerekî giran qewimî. Hêzên PKKê li dijî yekîneyên operasyonê yên Tirkiyê êrişên xurt lidar xistin ku di encamê de 7 leşker hatin kuştin ku yek ji wan payebilind bû û gelek leşker jî birîndar bûn.
PKK herwiha di daxuyaniya xwe diyar kir ku 2 endamên wê jî di van şeran de jiyana xwe ji dest dane.
PKKê di dewama daxuyaniya xwe de diyar dike ku 12'ê Îlonê saet 05:10'an jî hêzên wê li qada Rûbarokê ya navçeya Şemzînanê ya Colemêrgê li dijî artêşa Tirkiyê ya li ku Tengava Benê bi cih bûbû ji 2 baskên cuda ve êrişek li dar xist ku di encamê dede 3 kozikên artêşa Tirkiyê îmha bûn, lê hejmara kuştî û birîndarên artêşa Tirkiyê nehat tespîtkirin. Artêşa Tirkiyê piştî çalakiyê bi hawan û obusan bombe li herêmê barand.
9`ê Îlonê artêşa Tirkiyê li qada Kela Memê ya navçeya Qilabana Şirnexê li derdora qadên Deriyê Qaçê, Çemê Xeçkê, Gundê Sîran, Gundê Mehrê û Gundê Hozê dest bi operasyoneke berfireh kir. Artêşa Tirkiyê heta 12'ê Îlonê operasyon berdewam kir, lê bêencam piştî viya ji qadê vekişiya.
Balafirên şer ên Artêşa Tirkiyê herwiha li 12`ê Îlonê saet 10:00 bombe li qada Benê ya herêma Avaşînê barandin.
14`ê Îlonê saet 16:20'î jî balafirên şer bombe li qada Çemço ya herêma Zapê barandin. Şewata ku ji ber bombaranê li herêmê rû da hîn dewam dike.
PKKê di dewamê de îdia dike ku ji ber bombardûmanê tiştek bi hêzên wê nehatiye.
