Li Samsunê di nav barhilgirekê de 161 koçber hatin girtin
Li bajarê Samsunê yê Tirkiyê di nav barhilgirekê de 161 koçber hatin girtin. Li bajarokê Tekkekoy ê Samsunê ser riya Samsun-Orduyê li Xala Pişkinînê ya Geleman li ser gumanê barhilgirek ji aliyê polîsan ve hat rawestandin.
Hejmarek koçber çadira barhilgirê bi kêran qetandin û xwestin birevin. Hêzên polîs bo cihê bûyerê hatin şandin û koçberên dixwestin birevin ji aliyê hêzên ewlekariyê ve hatin girtin.
Ji ber demeke dirêj di nav barhilgirê de bûn, koçberan ji ber germê û bê hewayiyê çadir qetandin û xwestin hinekî nefesê bistînin.
Barhilgir bo Rêveberiya Beşa Qeçaxçîtiya bi Koçberan hat veguhestin û şofêrê wê bi tawanê qeçaxçîtiya bi mirovan hat desteserkirin. Herçiqas şofêr gotibû ku 115 koçber di nav barhilgirê de ne, lê dema polîsan ew peya kirin û jimartin derket ku 161 koçber têde bûne.
Li gor agahiyên hatine belavkirin, koçberên desteserkirî xelkê Afganîstan û Pakîstanê ne û lêpirsîna derbarê bûyerê de berdewam e.
