Dadgeheke çeteyên Tirkiyê li Efrînê ji 5 kesên malbateke kurd re cezayên giran birî
Li herêma dagîrkirî ya Efrînê li bakurê rojavayê Sûriyê, dadgehek çeteyên Tirkiyê 5 kes ji malbateke Kurd bi cezayên giran hukim kirin.
Di zindaneke ser bi hikûmeta çeteyên Tirkiyê de, jinek bi 12 salan û ciwanekî 20 salî jî bi hukmê Îdamê hatine sizadan.
Kesên ku ceza li ser wan hatine birrîn ev in:
Zêneb Mihemed Olaşî 12 sal
Izedîn Yûsif Mistefa 13 sal
Mistefa Mihemed Mistefa 13 sal
Yûsif Mistefa Hisên 3 sal
Cezayê darvekirinê ji bo Hisên Yûsif Mistefa Hisên hatiye sepandin.
Ji bajarê Helebê, Ahemed Mistefa Hisên, mamê ciwanê Kurd ê hukmkirî ji Tora Medyayî ya Rûdawê re got, gunehê kesûkarên wî tenê ew e ku Kurd in û li Efrînê mane.
Ahemed Mistefa Hisên got “ Ez bi navê malbatê bang li saziyê cîhanê û Kurdan dikim ku gişt li dijê vê yekê rabin û vî hikmê li ser vî gencî rawestînin. Me tiştek nekiriye, ev hikm zilm e ku li ser vî zarokî sepandine. Cezayê îdamê li ti derê nemaye ku vî zarokî îdam bikim. Vî zarokî çi kiriye? Gunehê wan tenê ev e ku Kurmanc e û li Efrînê rûniştî ne.”
Malbata Kurd a ku endamên wê hatine hukmkirin ji bajarokê Şiyê ye û li taxa Mehmûdiyê ya bajarê Efrînê niştecî bûn.
