SAHAR

Berdevkê Wezareta Karên Derve ya Komara Îslamî ya Îranê got ku di van çend mehên derbasbûyî de pêwendiyên rêkûpêk di navbera Îran û Erebistana Siûdî de çêbûne û got: "Li ser mijarên dualî danûstandin û hevdîtinên baş pêk hatin."

Berdevkê Wezareta Karên Derve ya Komara Îslamî ya Îranê Seîd Xetîbzade îro der barê rewşa dawîn a hevdîtinên Îran û Siûdî de ji IRNAyê re axivî û diyar kir ku me di çend mehên derbasbûyî de çend dewreyên hevdîtinên bi hikûmeta Erebistana Siûdî re li Bexdayê hebû û wiha pê de çû: "Di van hevdîtinan de danûstandinên baş û cidî li ser ewlehiya Kendava Farisê û pêşketina wê pêk hatin. "

Xetîbzade tekez kir: "Ev gotûbêj qet nesekinîn û piştî ku hukumeta 13 -an a Îranê damezirî, peyam di astek guncan de hatin pêşkêşkirin."

Berdevkê Wezareta Karên Derve ya Komara Îslamî ya Îranê herwiha got: Ger hikûmeta paşatiya Siûdî bi cidî û giranî balê bide ser peyama Komara Îslamî ya Îranê ku çareseriya pirsgirêkên herêmê di hundurê herêmê bi xwe de ye û divê em bigihîjin mekanîzmeke herêmî ya berfireh, em ê bikarin bibin xwediyê aramî, ewlehî û pêwendiya baş di navbera her du welatên girîng ên navçê anku Îran û Erebistanê de.

Şahê Erebîstana Siûdî Selman bîn Ebdulezîz di axaftina xwe ya li Civata Giştî ya Neteweyên Yekbûyî roja Çarşemê de diyar kir ku ew hêvî dike ku hevdîtinên welatê wî bi Îranê re bibin sedema baweriyê.