Numan Kûrtûlmuş: Divê PKK bi lez xwe hilweşîne
Serokê Parlimana Tirkiyê got: Em dê destûrê nedin provokasyonan û tekez kir ku Komîsyona aşitiyê dê destûrê amade neke lê tenê pêşniyaran pêşkêş bike.
Numan Kûrtûlmuş, di gotûbêjekê de got: Sedema hebûna Komîsyonê îlana hilweşîna PKK`yê ye. Wî got: Divê PKK bi lez pêvajoya danîna çekan û xwehilweşandina xwe bidomîne. Pêwîst e ev pêvajo bê dîtin, tespîtkirin û tescîlkirin da ku gavên din karibin bên avêtin.
Serokê Parlimana Tirkiyê her wiha got ew dixwazin pêvajoyê bêyî ku zêde dirêj bikin, bi awayekî bibandor, birêve bibin.
Kûrtûlmûş tekez kir ku dema xebatê ya Komîsyonê heta 31`ê Kanûna Pêşîn a 2025`an e û eger pêwîst be dê dema Komîsyonê were dirêjkirin.
Wî ragihand ku di hefteyên pêş de dê nûnerên karsaz, sendîka û akademîsyenan vexwînin Komîsyonê.
