Li Tirkiyê erdên genim lê tê çandin 24 milyon donim kêm bûne
Li Tirkiyê, erdên ku genim lê tê çandin 24 milyon donim kêm bûne.
Ji ber şerê Rûsya û Ukrayn, cîhan bi giştî bi qeyrana genim û xorakê re rûbirû maye. Qeyrana genim bandoreke zêde li Tirkiyê jî kiriye, ku welatekî girîng ê çandiniyê ye.
Opozîsyona Tirkiyê rexneya li desthilatê digre û dibêje, desthilat girîngiya pêwîst nade çandiniyê û piştgiriya cotkaran nake.
Parlamenterê CHPyê yê Edenê û Endamê Komîsyona Karên Gund, Daristan û Çandiniyê yê Parlamentoya Tirkiyê Ayhan Barut ragihand; “Ji ber xoşewîstên hawirdeyê qadên çandiniyê bi lez kêm dibin. Eger piştgiriya cotkarên xwecihî neyê kirin, dê qeyrana xorakê rû bide.”
Ayhan Barut derbarê qeyrana xorakê de hişyarî da û got: “Li Tirkiyê li ser 93 milyon donim erd genim dihat berhemanîn, lê demên dawî daket 69 milyon doniman û 24 milyon donim kêm bû. Di dema desthilata AKPyê de 70 milyon ton genim hat hawirdekirin û 20 milyar dolar pere hat dayîn. Divê çandiniya welatê me têre me bike. Desthilata AKPê li şûna berhemanîna xwecihî û piştgiriya cotkaran, rêya hawirdekirinê hildibijêre. Eger ev 20 milyar dolar wek piştgirî bo cotkarên me bihata dayîn, dê bi zêdetirî bihata berhemanîn û em ji bo hawirdeyê neçar nediman.”
