Bûldan: Li hemberî zext û zordariyê li girtîgehan bêdeng nemînin
Hevseroka Giştî ya HDP'ê Pervîn Bûldan li Amedê tevlî Nobeda Edaletê ya xizmên girtiyan bû û bang li raya giştî kir ku li hemberî zilma li girtîgehan bêdeng nemîne.
Nobeda Edaletê ya malbatên girtiyan ku ji bo berdana girtiyên nexweş û girtiyên cezayê wan qediyaye tê meşandin, li ber Saziya Tipa Edlî ya li Amedê dewam kir.
Hevseroka Giştî ya HDP'ê Pervîn Bûldan, Berdevka Meclîsa Jinan a HDP'ê Ayşe Acar Başaran û endam û rêveberên gelek sazî û partiyên li Kurdistana Tirkiyê tevlî çalakiyê bûn.
Hevseroka Giştî ya HDP'ê Pervîn Bûldan piştre axivî û got, "6 meh in dayikên me banga edaletê dikin. Ne tenê li vir di heman demê de li Wan, Îzmîr, Stenbol û Rihayê dayikên me daxwaza edaletê dikin û dixwazin binpêkirina mafên mirovan ên li girtîgehan bi dawî bibin. berpirsyariya herî mezin e ku dengê dilê dayikan,qîrîna dayikan bêne bihîstin."
Bûldan diyar kir, ku ji bo girtiyên nexweş neyên berdan rayedar çi ji destê wan tê dikin û got, "Niha hezar û 600 girtiyên nexweş li girtîgehan e, tevî ku zanin di her kêliyê de dikarin jiyana xwe ji dest bidin, destûr nayê dayin ku li derve bêne dermankirin. Girtiyên nexweş li ber mirinê têne berdan û rojên dawî li nexweşxanan jiyana xwe ji dest didin.
Welat gihîştiye wê astê. Girtîgeh bûye eynika her welatekî. Eger li girtîgehekê mafên mirovan tê binpêkirin, eger zilm li girtiyan tê kirin, eger zext li ser girtiyan hebe, eger girtî nikarin bi malbata xwe re biaxivin, her tiştên ku dikin bi cezayên dîsîplînê tê cezakirin û destûr nayê dayin ku bi xizm û hevalên xwe re bidin û bistînin, hingî mirov nikare bêje ku li vî welatî edalet û hiqûq heye."
Pervîn Bûldan got, "Em bang li mirovên xwedî wijdan ên li Tirkiyê dikin; dayikên me bi tenê nînin. Li hemberî neheqî û bêhiqûqiya ku li hevalên me yên li girtîgehan dikin, em li bendê ne ku alîgirên demokrasî û edaletê li ber vê bêhiqûqiyê rabin."
