SAHAR

Platforma Zimanê Kurdî bi armanca nûnertiya xwe li Mêrdînê ava bike civînek li dar xist. Şandeya ku hat Mêrdînê diyar kir ku heya zimanê kurdî bibe xwedî statû ew ê xebatên xwe bidomînin.

Li gorî rapora ajansa nûçeya a Mezopotamyayê (MA), Platforma Zimanê Kûrdî (PZK) ji bo li Mêrdînê nûnertiya xwe ava bike bi partiyên siyasî û zimanzanan re li hev kom bûn.

Hevserokê Partiya Demokratîk a Gelan (HDP) ê Amedê Zeyad Ceylan, berdevkê Platformê Şerefxan Cizîrê ji Amedê û Hevseroka HDP’a Mêrdînê Perîxan Agaoglu, hevserokê Partiya Herêmên Demokratîk (DBP) ê Mêrdînê Weysî Parildi jî ji Mêrdînê beşdarî civînê bûn. Şandeyê li avahiya KESK’ê ya Mêrdînê civîna çapemeniyê li dar xist û piştî civînê daxuyanî da çapemeniyê. Berdevkê Platformê Şerefxan Cizîrî axivî.

 ‘DIVÊ ZIMANÊ KURDÎ BIBE ZIMANÊ FERMÎ Û PERWERDEHIYÊ’

 Cizîrî ku têkildarê vekirina nûnertiya Platformê axivî diyar kir ku ew ê li Mêrdînê û hemû navçeyên wê xebatên zimanê kurdî bidin meşandin. Cizîrî da zanîn ku ji bo zimanê kurdî bibe zimanê fermî ew ê heya dawî li pey daxwaz û pêşniyazên xwe bin û wiha got: “Me li ser 2 esasên bingehîn dest bi xebatên xwe yên Platformê kirin. Ya yekemîn perwerdeya bi zimanê kurdî û ya duyemîn jî ji bo zimanê kurdî bibe zimanê perwerdeyê ye. Pêwîst e di hemû sazî û dezgehên dewletê de zimanê kurdî were axaftin û pejirandin. Bi taybetî jî divê ji dibistana dayikê heyanî zanîngehê perwerdeya bi zimanê kurdî were dayîn.”

 NÊZÎKATIYA ÇEWT A LI HEMBERÎ KURDÎ REXNE KIR  Cizîrî bal kişand ser kesên ku dibêjin zimanê kurdî ne zimanekî pedegojîk e û wiha wan rexne kir: “Siyasetmendar û rojnamevanên ku di derbarê zimanê kurdî de tu agahiya wan nîne çawa li ser nirxandin dikin. Kesekî ku bi zimanekî nizane çawa dikare di derbarê wê de bibe xwedî nêrîn û weke zimanekî nepedegojîk pênase bike. Ev dîtin û nêzîkatiyên pûç in. Em dikarin van nêrînên wan bi mînakan jî pûç bikin.”

 Cizîrî herî dawî diyar kir ku heyanî zimanê kurdî bibe xwedî statû ew ê li ber xwe bidin û xebatên xwe bidin berdewamkirin.