Erdogan bi du serkirdeyên sunnî yên Iraqî yên neyarên hev re hevdîtin kir
Serkomarê Tirkiyê Receb Teyib Erdogan bi cuda ligel du serkirdeyên sunnî yên Iraqê hevdîtin kir.
Li gorî medyaya Tirkiyê, serkomarê Tirkiyê Recep Tayyîp Erdogan duhî li Enqerê bi serokê parlementoya Iraqê Mihemed Helbûsî û serokê tifaqa Ezm Xemîs, Xencer re cuda cuda hevdîtin kir.
Hikûmeta Tirkiyê li ser naveroka hevdîtinan ti daxuyaniyek nedaye, lê Xemîs Xencer li ser twîttera xwe gotiye, civîna wî bi Erdogan re “girîng û berhmedar” bûye û wî daxwaz kiriye vîze di navbera Tirkiye û Iraqê de were rakirin.
Helbûsî û Xencer du serkirdeyên sunnî ne, lê hevrikên hev in. Helbûsî di hilbijartinên îsal de serokatiya tifaqa Teqedum dike û Xencer jî serokatiya tifaqa Ezm dike.
Çavdêrên siyasî dibêjin, hevdîtina wan serkirdeyên Iraqî bi Erdogan re di demekî de ku tenê 5 roja mane bo hilbijartinan, watedar e, çimkî îhtimal heye Erdogan hewla lihevanîna wan dabe û bixwaze wan di hilbijartinan de nêzîkî hev bike.
