PKK: Li Dihokê 4 şervanên me yên ji tedawiyê vedigeriyan bi êrişa hewayî hatin kuştin
PKK’ê ragihand ku şeva 20’ê Gulanê li derdora gundê Mangişkê yê Dihokê li Herêma Kurdistanê, 4 şervanên ji tedawiyê vedigeriyan di êrişa hewayî ya dewleta Tirkiyê de hatin kuştin.
Navenda Ragihandin û Çapemeniyê ya baskê çekdar ê PKK’ê nasnameya 4 gerîlayên ku di 20’ê Gulanê de di êrişa hewayî de jiyana xwe ji dest dane eşkere kir.
PKKê di vê barê de daxuyaniyeke daye weşandin û tê de ragihandiye ku şeva 20’ê Gulanê, komek ji şervanên wê yên ji ber pirsgirêkên tenduristiyê dihate tedawîkirin û ji dermankirinê vedigeriyan, li derdora gundê Mangişkê yê Dihokê bûn hedefa êrişa hewayî ya dewleta Tirkiyê. Di vê êrişê de 4 şervanên PKKê jiyana xwe ji dest dane.
Piraniya endamên PKKê ku bi vî awayî tên kuştin di encama sîxoriya kesên xwecî de jiyana xwe ji dest didin. Kesên hanê berdêla pere û şixulan ji artêş û rêxistina sîxoriiyê ya dewleta Tirkiyê (MIT) sîxoriyê dikin.
