HGPê êrişa li dijî fermandariya Firînê ya Amedê lixwe girt
Hêzên Parastina Gel (HPG) ku baskê serbazî yê PKKê ye êrişa li dijî Heştemîn Fermandariya Firînê ya Amedê lixwe girt.
Li gorî nûçeya Rûdawê, HPGê bi daxuyaniyekê ragihand ku hêzên wan 19ê Gulanê li dijî Heştemîn Fermandariya Firînê ya Amedê ya Artêşa Tirkiyê êrişek encam dan.
Li Heştemîn Fermandariya Firînê ya Amedê şevê din di demjimêr 00.30ê de du çalakiyên cuda bi firokeyên maket hatibûn encam dan .HPGê ku baskê çekdarî yê PKKê ye îro di daxuyaniyekê de ew çalakî girt stûye xwe.
HPGê di daxuyaniya xwe de ragihand ku hêzek wan ya bi navê "Hêzên Parastina Hewayî ya Şehit Delal" li dijî binkeya artêşa Tirkiyê, çalakiyek encam daye û got “ hêzên me şeva 19ê Gulanê li dijî binkeya 8emîn ya hewayî ya artêşa Tirkiyê li Amedê çalakiyek serkeftî pêk aniye.”
HPGê amaje bi wê yekê kir ku agahiyên zêdetir ên li ser wê êrişê dê piştre bi raya giştî re bê parvekirin.
Wezareta Berevaniya Tirkiyê li ser twîttera xwe êrişa li ser binkeyeke leşkerî ya xwe li Amedê piştrast kiribû û ragihandibû ku, ew dê hejmara hêzên ewlehiyê li navçeyê zêdetir bikin.
Piştî bihîstina dengê teqînê, hejmareke zêde ji hêzên ewlehiyê, ambulans û tîmên tendirustiyê ber bi cihê bûyerê ve çûbûn.
Parêzgariya Amedê jî di daxuyaniyekê de ragihandibû ku doh bi şev di demjimêr 00:30 hewla êrişê bo ser Heştemîn Fermandariya Firînê ya Amedê hatiye dan. Firokeya navborî di êrişê de hatiye xistin, lê belê ti zirarek negihîştiye Heştemîn Fermandariya Firînê ya Amedê.”
