Erdogan: Tirkiyê mezintirîn keşfa dîroka xwe kir û gaz dît
Serokomarê Tirkiyê Receb Teyib Erdogan îro di gotarekê de li Stenbolê ragihand, Tirkiyê li Deryaya Reş keşfa xwe ya herî mezin a dîroka xwe kiriye û gaza xwezayî dîtiye.
Recep Tayyip Erdogan got, “keştiya me ya Fatih di bîra Tuna 1 de ku 20 Temûza 2020an dest bi kolandina wê kiribû, 320 milyar metrekûp gaza xwezayî dît.”
Erdogan dîtina gaza xwezayî ji aliyê welatê xwe ve li Deryaya Reş weke “mezintirîn keşfa di dîroka Tirkiyê de” bi nav kir.
Serokomarê Tirkiyê diyar kir, “armanca me ya sereke ew e ku di sala 2023an da em gaza Deryaya Reş pêşkeşî milletê xwe bikin.”
Recep Tayyip Erdogan da zanîn, Tirkiyê heta niha bi du keştiyên xwe yên kolandinê, Fatih û Yavuz 9 bîrên kûr li Deryaya Spî û Deryaya Reş lê dane û got, di kolandina dawîn de bû nesîb em mizginiyê bidin gelê xwe."
Serokomarê Tirkiyê herwiha amaje bi hewldanên welatê xwe li Deryaya Spî jî kir û got, “emê lezê bidin xebata xwe ya li Deryaya Spî ya ji bo dîtina çavkaniyên enerjiyê.” Erdogan ragihand: “Înşeallah em ji bo Deryaya Spî jî çaverêyî mizgîniyeke wiha ne.”
Tirkiye li sînoreke berfireh a Deryaya Spî li dû çavkaniyên enerjiyê digere û li wê derê du navçeyên qedexekirî ragihandiye.
Ji ber wan çalakiyên Tirkiyê, di navbera wî welatî û Yewnanistanê de aloziyek mezin derketiye û Yewnanistan dibêje, Tirkiye sînorê wê yê deryayî binpê kiriye.
