Artêşa Tirkiyê û çeteyên wê Eyn Îsa topbaran kir
Hêzên Tirkiyê û çeteyên wê bajarokê Eyn Îsa li bakurê Reqayê topbaran kirin û çend top li nav gundê el-Mişêrfe yê li rojhilatê bajarokê ketin.
Li gor çalakvanên xwecihî, ev du roj in hêzên Tirkiyê û çeteyên wê bajarokê Eyn Îsa li bakurê Reqayê topbaran dikin, di nav de çend top li nav gundê el-Mişêrfe yê li rojhilatê bajarok ketine, lê heta niha ti zanyarî li ser zerar û ziyanan nehatine dayîn.
Roja 2ê Nîsanê hêzên Tirkiyê navçeyên bakurê Reqayê ku Hêzên Sûriya Demokratîk (HSD) lê dimînin topbaran kirin, di nav de gundê Mieleq û Kampa Eyn Îsa li bakurê Reqayê.
Eyn Îsa bajarekî biçûk e, lê xwedî girîngiyeke stratejîk a mezin e. Eger ew bajar bikeve destê Tirkiyê û çeteyan, ew tê wê wateyê riya di navbera Herêma Cizîrê û Kobanî de qût dibe.
Bajarê Eyn Îsa, 47 kîlometreyan dûrî bajarê Reqa ye, 66 kîlometreyan li başûrê rojhilatê Kobanî ye û 30 kîlometreyan ji navenda bajarê Girê Spî dûr e ku ew jî di bin destê hêzên Tirkiyê û grûpên çete de ye.
Girîngiya stratejîk a Eyn Îsa ji wê yekê tê ku li ser riya navdewletî ya M-4 Rodko ye. Rêya M-4 Herêma Cizîrê bi Heleb, Laziqiyê, Hims, Hema û Şamê ve girêdide.
