Hêzên Tirkiyê û çeteyên wê li Zirganê zarokek kuşt
Di êrişên artêşa Tirkiyê ya dagirker û çeteyên wê yên li ser gundewarê Zirganê de, zarokekî jiyana xwe ji dest da û gelek welatî birîndar bûn.
Li gor nûçeya çavkaniyên herêmî ji ber topbarana artêşa Tirkiyê ya dagirker û çeteyên wê ya li ser gundên Zirganê de zarokê bi nave Elam Elî El-Îsa yê 2 salî jiyana xwe ji dest da û birayekî wî yê 5 salî birîndar bû. Zarokê birîndar rakirina nexweşxneke bajarê Hesekê. Tê gotin ku di êrişa li ser gundên Esediyê yê bakurê navenda navçeyê de birîndarên din hene.
Dagirker ji baregehên xwe yên li Serêkaniyê, gundên Dada Ebdal, Niwêha, Esediyê, Xidrawî, Um Hermele, Til Werd û Xirbe Şeîr ên Zirganê dane ber topan. Her wiha êrişên xwe yên li ser gundên Til Şenan ê rojhilatê navenda navçeya Til Temirê, Dirdara yê bakurê navenda navçeyê, Um El-Kêf û Til Cuma, Til Gerabêt û Til Kêfcî, Tewîla yên rojavayê navenda navçeyê bi hawan û moşekan zêde kirine.
Ji ber êrişên esmanî û bejahî yên hikûmeta Tirkiyê û çeteyên wê ser bakur û rojhilata Sûriyê heta niha bi dehan jin û zarok hatine kuştin, lê belê piştgirên rojavayî yên vê hikûmetê xwe li hemberî van tawanan bê deng kirine.
