SAHAR

Polîsên leşkerî yên Rûsyayê tevî artêşa Tirkiyê vê sibehê li gundewarên rojavayê navçeya Dirbêsiyê dewriyeyeke hevbeş meşand. Ji dema pêkanîna peymana Soçiyê de, ev dewriyeya hebeş a 40`emîn e.

Dewriyeya hevbeş ji dergeha Şêrik a sînorî (13 km li rojavayê navenda navçeya Dirbêsiyê) dest pê kir. Dewriye ji 5 panzêr û 2 helîkopterên Rûsyayê û 4 panzêrên artêşa Tirkiyê pêk hat.

Dewriyeya Rûsya-Tirkiyê di gundên rojavayê navçeya Dirbêsiyê yên Şêrik, Delîk, Melek, Ebbas, Aliye, Îbrahîmiyê, Erade, Hilêwa, Feqîra, Kesra û Dehir El-Ereb re derbas bû. Piştre erbeyên artêşa Tirkiyê vegerîn xaka Tirkiyê û panzêrên Rûsyayê vegerîn baregeha xwe ya li bajarê Qamişloyê.