Neteweyên Yekbûyî êrîşa Efrînê şermezar kir
Nûnerê Taybet ê Netewên Yekbûyî yê bo Karûbarên Sûriyê Geir Pedersen êrîşa li ser nexweşxaneya li bajarê Efrînê ya Bakurê Sûriyê şermezar kir û got ku vê êrîşê îsbat kir ku divê agirbesteke li seranserî Sûriyê were ragihandin û li gorî biryara 2254 ya Encûmena Asayişa Navnetewî krîz were çareserkirin.
Li gorî nûçeya Rûdawê, Nûnerê Taybet ê Netewên Yekbûyî yê bo Karûbarên Sûriyê Geir Pedersen derbarê êrişa li ser Efrînê de daxuyaniyek belav kir û tê de got: “Ez êrîşa li ser Nexweşxaneya Şîfa ya bajarê Efrînê li bakurê Sûriyê ku di wê êrîşê de welatiyên sivîl canê xwe ji dest dan û birîndar bûn û beşek ji nexweşxaneyê wêran kirin, bi tundî şermezar dikim.”
Geir Pedersen tekez kir ku êrişên bi wî rengî nayên qebûlkirin û beşek ji karmendên tendirustiyê bûne qurbanî û got: “Êrîşên wiha yên tirsnak ên li hemberî sivîlan û jêrxaneya sivîl, nayên qebûlkirinê û divê êriş bêne rawestandin."
Pedersen herwiha diyar kir ku divê hemû aliyên ku di şerê Sûriyeyê de beşdar in, pabendî qanûnên mirovî yên navneteweyî bin û ji bo parastina can, mal û milkên sivîlan bixebitin.
Nûnerê Taybet ê Netewên Yekbûyî yê bo Karûbarên Sûriyê di dawiya daxuyaniya xwe de destnîşan dike ku êrîşa li ser nexweşxaneya Efrînê û tundûtujiya li Sûriyê ya berdewam nîşan dide ku divê agirbesteke berfireh li Sûriyê were ragihandin û hewl ji bo cîbicîkirina biryara 2254 ya Encûmena Asayişa Navnetewî bêne dayîn.
Li Efrînê, di êrîşa 12ê Hezîrana 201ê ya li dijî nexweşxane û navenda bajêr de, 14 kesan canê xwe ji dest dan û 32 kes jî birîndar bûn.
Ev di halekî da ye ku NY li hemberî binpêkirinên her rojî yên artêşa Tirkiyê û komên çete yên ser bi wê li Efrîna dagirbûyî li dijî welatiyên kurd ên vî bajarî bêdeng e.
Ev zêdetirî sê salan e ku Efrîn di bin dagirkeriya artêşa Tirkiyê û komên ser bi wê ye.
