Li sînorê Kerkûkê DAIŞê hin stûnên elektrîkê teqandin
Hezîran 14, 2021 21:38 Asia/Tehran
Demeke li sînorê parêzgeha Kerkûkê stûnên elektrîkê ji aliyê çekdarên DAIŞê ve tên birîn û ji ber wê jî hemwelatiyên navçeyê di vê germa havînê de bê elektrîk dimînin.
Berpirsê beşa ragehandina tora elektrîkê yê Kerkûkê Elî Kerem ji BasNewsê re ragehand: ‘’Îro 14.06.2021ê ber bi sibehê li navçeya Bay Hesen a ser bi qeza Dubiz a sînorê parêzgeha Kerkûkê bi rêya teqandina bombeyên çandî ve çend stûnekî elektrîkê bûn armanca êrîşê û hatin birîn.’’
Elî Kerem bê ku amaje bi hejmara stûnan bike got, ew dê hewl bidin wan stûnan demekî kurt de çêbikin.
Heman demê de duh jî nêzîk gundê Dawudeluk a ser bi Riyaz a qeza Hewîce ya sînorê parêzgeha Kerkûkê jî bi rêya teqandinê ve çend stûnên din ên elektrîkê bûn armanca êrîşê.
