Berpirsê çandiniya parêzgeha Azerbaycana Rojavayê (Urmiyê) ya bakurê rojavayê Îranê ragihand, ew pêşbînî dikin îsal zêdetirî 260 hezar ton tirî li Urmiyê were çinîn, ew jî li gorî par %13 zêde dibe.

Berpirsê çandiniya Urmiyê, Resûl Celîlî ji malpera Mehrnews re gotiye, çinîna tiryan li Urmiyê dest pê kiriye û ew texmîn dikin îsal derdora 265 hezar ton tirî were çinîn.

Resûl Celîlî her wiha daye zanîn, li Urmiyê darên tiryan li ser rûbera 21 hezar û 808 hîktar hatine çandin ku beşek ji wan avî û beşek jî dêmî ne.

Bi gotina berpirsê çandiniya Urmiyê, darên tiryan yên bajarên Urmiye, Miyanduav û Neqede ji deverên din zêdetir berhem girtine, ji ber wê jî beşek mezin ji tiryan dê li wan bajaran were çinîn.

Parêzgeha Urmiyê piştî Qezvîn û Farsê sêyemîn parêzgeha Îranê ye di warê tiryan de.

Li Urmiyê derdora 30 çêşît tirî hene. Navên çend çêşîtên tiryan wiha ne: tiryên spî yên kişmişî, tiryên sor yên kişmişî, tiryên teberze, tiryên rîş baba, tiryên husênî, tiryên xelîlî.