DMME dê derbarê Denîz Nakî de biryarê bide
Dadgeha Mafên Mirovan a Ewropayê (DMME) sibê derbarê doza futbolîstê Kurd Denîz Nakî de biryara xwe aşkere dike.
Futbolîstê Kurd Denîz Nakî ku lîstikvanê Amedsporê bû, 31ê Çileya 2016an piştî pêşbirka li gel Bursasporê li hejmara xwe ya medya civakî amaje bi şerê li bajarên Kurdan kiribû û nivîsandibû, “Bila zarok nemirin û şekir jî bixwin.”
Lijneya Disiplînê ya Federasyona Futbolê ya Tirkiyê ji ber wê peyamê bi tometa “propogandaya îdeolojîk” Denîz Nakî ji 12 pêşbirkan dûr xistibû û 19.500 lîreyê Tirkî jî ceza dabû tîma Amedsporê.
Li ser vê yekê parêzerên Denîz Nakî û tîma Amedsporê serî li Dadgeha Mafên Mirovan a Ewropayê (DMME) dabûn.
DMME jî ku dê sibe biryara xwe aşkere bike, li ser vê dosyeyê heta 1ê Adara 2018an dem dabû Tirkiyê ku parastina xwe bike.
Jibilî Denîz Nakî, yek ji rêveberên berê yê tîma Galatasarayê Sedat Dogan û dadwerê berê yê Super Lîga Tirkiyê, li dijî Federasyona Futbolê ya Tirkiyê serî li DMMEyê dabûn.
