Amedspor: Wezareta Navxwe bersiva me neda
Amedsporê aşkere kir ku Wezareta Navxwe ya Tirkiyê bersiva daxwaza wan a ji bo encamdana kongreyê nedaye û ji ber wê yekê wan nekariye kongreya xwe ya asayî encam bidin.
Amedsporê derbarê encamdana 4emîn Kongreya Asayî ya wê tîmê de daxuyaniyek belav kir û aşkere kir ku wan serî li Wezareta Navxwe ya Tirkiyê dane bo ku kongreya xwe encam bidin.
Di daxuyaniya Amedsporê de amaje bi wê hatiye kirin ku Wezareta Navxwe ya Tirkiyê ku ji ber vîrusa Coronayê desthilata rêpêdana encamdana kongre û çalakiyan bi wê hatiye dayîn, heta niha jî bersiva daxwaza wan nedaye.
Amedspor dibêje, “Tîma me roja 4ê Tebaxa 2020an bi rêya Parêzgariya Amedê ji bo wergirtina îcazeya encamdana kongreyê serî li Wezareta Navxwe daye” û hatiye tekezkirin ku heta niha jî bersivek bi wan nehatiye dayîn.
Amedsporê amaje bi vê serdema belavbûna vîrusa Coronayê dike û dibêje, `ji bo ku ziyan negihije plansaziyên tîmên werzişê pêwîst e bi bilez bersiva serlêdanên wan bê dayîn. Em jî li bendê ne bilez bersiva me bê dayîn.`
Amedspor tekez dike ku dema ji aliyê Wezareta Navxwe ya Tirkiyê ve rê bi wan hat dayîn, ew dê kongreya xwe ya asayî encam bidin.
