SAHAR

Esnaf û welatiyên Stenbolê diyar kirin ku sedema krîzê, rêvebiriya welat e û gotin: "Erdogan, Tirkiye perîşan kiriye."

Ajansa Mezopotamyayê (MA) bi pênivîsa 'Îdrîs Sayilgan – Berfîn Karaman' nivîsiye: Esnaf û welatiyên Stenbolê ji ber krîza aborî êdî nikarin lazmatiyên xwe peyda bikin. Esnaf û welatiyan destnîşan kir ku, sedema krîzê "çaresernekirina pirsgirêka kurd" û rêvebiriya welat e. Her wiha gotin, tu hêviya wan ji îqtidarê nemaye. 

‘EM PERÎŞAN BÛNE'

 Bedriye Deger a 51 salî ku fikarên xwe yên ji bo pêşerojê anîn ziman, anî ziman ku 2 kurên wê yên di restoranê de dixebitîn ji ber qedexeyên pandemiyê betal mane û niha tenê bi meaşê keça wê ya ku di marketê de dixebite debara xwe dikin. Deger got: "Her roj her tişt biha dibe. Mirov êdî nikarin heqê kirêya xwe bidin. Em perîşan bûne. Li Mêrdînê gundê me şewitandin.

Em sirgûn bûn hatin van deran. Niha em ne dikarin vegerin û ne jî dikarin xaniyê xwe çêbikin. Em li vê der jî nikarin debara xwe bikin." 

‘ERDOGAN WELAT PERÎŞAN KIRIYE'

 Hayrettîn Batî jî ku aşxaneya wî heye, destnîşan kir ku sedema sereke ya krîzê çaresernekirina pirsgirêka kurd e û ji roja ku Erdogan bû desthilatdar heya niha krîz mezin bûye. Batî got: "vî kesî Tirkiye perîşan kiriye."

 Batî, kurdên ku raya xwe didin Erdogan jî rexne kir û got: "Tirkiyê gişî bidin min jî, ez raya xwe nadim Erdogan." 

NIKARIN HEQÊ KIRÊYA XWE BIDIN 

Esnaf Muslum Uzer jî, anî ziman ku di dema pandemiyê de hikûmetê tenê hezar TL daye wî û 3 meh in nikare heqê kirêya xwe bide. Uzer got: "Em li malê du kes dixebitin. Em bi zorê debara xwe dikin. Ji sibehê heya êvarî top vekiriye. 50 lîreyê bi dest min dikeve têra mesrefên min nake. Her wiha 3 kirêyên me yên xanî jî ketibûn ser hev. Sirf ji bo xwediyê xênî neyê ber derî, min deyn kir û da. Em tim deyndar in. Em dibêjin ha îro ha sibê, na bawer nakim baş bibe." 

Welatiya bi navê Nadîde jî bal kişand ser krîzê û got: "Her ku fiyet biha dibin gramaj jî kêm dibin. Ez aniha ji marketê hatim. Ev kaxeza tuwaletê 3 meh berê bi 11 TL'yan bû, niha bûye 17.5 TL. Me qeşar bi 17 TL'yan dikirî, niha bûye 25 TL. Mast bi 7 TL'yan bû, niha bûye 16 TL. Heyf e, gune ye."