Berdevka Partîya Dêmokiratîk a Gelan (HDP) got: ''Em dê mîtîngên Newroza 2020'ê di meha Gulanê de lidar bixin.''

Ebrû Gunay Berdevka HDP amajeyî ibtalkirina cejnên Newrozê bi hegera belavbûna vîrûsa Koronayê li Tirkîyê kir û got: ''Em dê mîtîngên Newroza 2020'ê bo meha Gulanê paşde bixin. Newroz jibo gelan nemaze Kurdan cejna Berxwedanê ye. Jibo me cejneke gellekî girîng e. Me hemî amadekarîyên lidarxistina baştir a Newrozê kiribûn lê, bi hegera belavbûna vîrûsa Koronayê li cîhanê me biryareke din da. Biryara ibtalkirina merasima Newrozê jibo me biryareke gellekî dijwar bû.''

Berdevka HDP herwiha amajeyî rîska zêde ya belavbûna vîrûsa Koronayê li zîndanan kir û got: ''Derbarê rewşa tenduristîya girtîyan li zîndanên Tirkîyê nirxandineke cida pêwîst e. Hemî zîndanîyên nexweş û yên di koma Rîska himberî vê vîrûsê da cî digirin, divê ji zîndanê bên azadkirinê.''