Amerîkayê hişyariyek tund da Tirkiyê û ragihand, eger Tirkiye sîstema berevaniya esmanî ya S-400 a Ûris wergire, dê bi awayekî rasterast pêrgî encamên gelek nerênî bibe.

Li gorî rapora Ajansa Nûçan a Reutersê, wekî berteka herîdawîyê ya li ser kirîna mûşekên S-400 ên Rûsyayê, Wezareta Karên Derve ya Amerîkayê ultîmatom da Tirkiyê û ragihand, eger Tirkiye wan mûşekan wergire, dê bi awayekî rasterast pêrgî dûhatên gelek xirab û nerênî bibe.

Wezareta Karên Derve ya Amerîkayê ragihandiye ku sîstema berevaniya esmanî ya S-400, ne li gorî standartên NATO`yê ye, lewma jî divê Tirkiye mûşekên Patriot ên Amerîkî bikire.

Beriya niha Serokomarê Tirkiyê, Receb Teyîb Erdogan ragihandibû ku li hemberî kirîna mûşekên S-400 ên Ûris, Amerîka ti cezayan ser Tirkiyê de nasepîne.