Partiya Demokratîk a Gelan (HDP) li ser biryara Desteya Bilind a Hilbijartinan ku belgenamê nade berbijarên serketî yên ku bi Biryarnameya di Hikmê Qanûnê de hatibûn dûrxistinê, ragihand ku biryara Desteya Bilind a Hilbijartinan ``komployeke sîyasî``ye.

Berdevkê HDP`ê Saruhan Oluç li Enqerê derbarê vê biyara Desteya Bilind a Hilbijartinan a Tirkiyê de civîneke rojnamevanîyê lidar xist û ragihand ku komployeke sîyasî dijî wan tê meşandin.

Saruhan Oluç wiha got: “Weke hûn dizanîn Desteya Bilind a Hilbijartinan ragihand ku ew dê belgenameyê nede berbijarên ku berê bi Biryarnameya di Hikmê Qanûnê de ji karê xwe hatibûn dûrxistinê û yê berbijarên derdayî dayne şûna wan.”

Oluç biryara Desteya Bilind a Hilbijartinan a Tirkiyê wek komployekê da nasandin û wiha pêde çû: “Bi zelalî diyar e ku Desteya Bilind a Hilbijartinan a Tirkiyê perçeyek ji komploya siyasî ya hevpeyamaniya MHP û AKP`ê ye. Mixabin wê desteyê li ber me kemîn daniye. Mixabin em dibin şahid ku niha dadger jî kemînan dadinin. Desteya Bilind a Hilbijartinan a Tirkiyê dikarî berî pêvajoya navnivîsîna berbijara ragihîne, kesên bi Biryarnameya di Hikmê Qanûnê de ji kart hatine derxistin nikarin bibin berbijar. Lê ev yek nekir.”

Desteya Bilind a Hilbijartinan a Tirkiyê (YSK) duh Çarşemê biryar da ku belgenamê nade berbijarên serketî yên di hilbijartinên 31`ê Adarê de ku bi Biryarnameya di Hikmê Qanûnê de hatibûn dûrxistinê,

Berbijara HDP`ê ya ji bo Şaredariya Sêrtê Bêrîvan Helen, berbijarê navçeya Rezan (Baglar) a Amedê Zeyad Ceylan, berbijarê nahiyeya Dagpinar a navçeya Dîgor a Qersê Abubekir Erkmen, berbijarê navçeya Tuşba ya Wanê Yilmaz Berki, li navçeya Edremîtê Gulcan Kaçmaz û li Bêgirê Leyla Atsak bi Biryarnameya di Hikmê Qanûnê de ji karê xwe hatine dûrxistin.