Efrîna dagirbûyî: Çekdarên ser bi Tirkiyê 7 welatiyên Kurd girtin
Çekdarên girêdayî Tirkiyê 7 welatiyên Kurd ji gundekî herêma Efrînê ya Bakur û Rojhilatê Sûriyê girtin. 6 ji wan Kurdên Êzidî ne. Herwiha çekdaran dest bi ser 3 malên welatiyên Kurd de jî girt.
Li gorî nûçeya Rûdawê, Rêveberê Saziya Êzidîna Elî Îso da zanîn ku 6 Kurdên Êzidî, herdu rojên çarşem û pênşemê, li gundê Xezêwiyê hatine girtin.
Li gor zanyariyên ku Elî Îso dane, navên kesên hatine girtin wiha ne: Omer Ziyad Hemo yê 27 salî, Berekat Ziyad Hemo yê 20 salî, pismamê wan Fermend Hemo yê 27 salî, Ehmed Hesen Yûsif ê 25 salî, Yûsif Hesen Yûsif ê 18 salî û Heval Mûsa yê 28 salî.
Rêveberê Saziya Êzidîna herweha diyar kir ku ligel her 6 Kurdên Êzidî, welatî Cemîl Elî yê 28 salî, hatiye girtin.
Çekdaran 3 malbatên Kurd ji malên wan derxistin
Çend çavkaniyên xwecihî ji nava bajarê Efrînê belav kirine ku grûpên çekdar ên ser bi Tirkiyê ve, dest danîne ser malên çend welatiyên Kurd li taxa Eşrefiyê li tenişt wêstgeha elektrîkê û ew ji malên wan derxistine.
Li gor heman çavkaniyan, çekdaran dest danîne ser malên her yek ji Mihemed Dawûd ku ew bi xwe nexweş e û malên du kurên wî jî, da ku hinek malbatên din ji aliyê xwe di wan malan de bi cih bikin.
Bi sedan binpêkarî li dijî xelkê sivîl hatine tomarkirin
