Wezîra Berevaniya Almanyayê Annegret Kramp Karrenbauer piştî serdana xwe ya Bexdayê gehişt Hewlêrê.

Wezîra Berevaniyê ya Almanyayê Annegret Kramp Karrenbauer bi balafireke taybet ji Bexdayê ve gehîşte Hewlêrê û biryar e ligel berpirsên Herêma Kurdistanê bicive.

Tê çaverêkirin Annegret Kramp Karrenbauer ligel Wezîrê Hêzên Pêşmerge Şoreş Ismayîl gotûbêjê bike û serdana wan binkeyên serbazî bike ku rahênerên Almanya têde rahênanê bi Hêzên Pêşmerge dikin.

Biryar e ku Wezîra Berevaniyê ya Almanyayê piştî seredan û gotûbêjan di civîneke çapemenîyê de encamên seredana xwe ya Bexda û Hewlêrê ragihîne.

Almanê di çarçova alîkarîyên Hevalbendîya Cîhanî ya DAIŞ`ê de alîkarîyên leşkerî û çek û rext dane Herêma Kurdistanê û nexweşxaneyeke taybet bi Hêzên Pêşmerge li Hewlêrê damezirandîye.

Perwerdekirina Hêzên Pêşmerge bi merema naskirina têknîkên nû yên cengê û alavên nû yên leşkerî ji sala 2014`an ve û jibo sekinîna himberî DAIŞ`ê ji hêla 7 welatên endamê Hevalbendîya Cîhanî ya Dijî DAIŞ`ê ve destpê bûye û niha jî didome.

Wezîra Berevaniyê ya Almanyayê li Bexdayê bi Serokomarê Iraqê Berhem Salih û Serokwezîrê Iraqê Adil Ebdulmehdî û Wezîrê Berevaniya wî welatî Necah Şemer re civiyabû.

Di hevdîtinê de behsa çawaniya avedankirina wan deverên ku di şerê DAIŞ`ê de wêran bûne, hat kirin.

Wezîra Berevaniyê ya Almanyayê piştî hevdîtinên li Bexdayê pêgirî kir ku bi dû domandina hevkarîya her du welatan e.

Wê herwiha got:  DAIŞ li Iraqê xilas nebûye ji ber wê jî ew ê alîkarîya bo hêzên Iraqî û Herêma Kurdistanê bidomînin.