Karvedanên welatan li hemberî bûyerên li Amerîkayê
Piştî bûyerên li Kongrêsa Amerîkayê, çendîn welat û serokên welatan helwesta xwe nîşan dan.
Beşek ji alîgirên Donald Trump çûne nav Kongrêsa Amerîkayê li Washingtonê û ew jî bû sedema aloziyan û heta niha 4 kesan canê xwe ji dest dane û hejmarek ji polîs û xwepêşanderan jî birîndar bûn.
Serokwezîrê Brîtanyayê Boris Johnson ragihand ku bûyerên li Waşîntonê, cîhê şermê ne û herwiha got: Ew di çarçoveya Amerîkayê de piştevaniyê li demokrasiyê dikin û gelek girîng e ku desthilat bi awayekî rêkûpêk bê radestkirin.
Johnson herwiha got: "Amerîka dewletek e ku li ser asta cîhanê demokrasiyê diparêze".
Wezîrê Derve yê Almanyayê Heiko Maas jî ragihand ku dijminên demokrasiyê berê xwe didin van dîmenên li Waşîntonê û kêf dikin û divê Trump û alîgirên xwe biryara dengdêrên Amerîkî qebûl bikin û demokrasiyê nexin bin piyan.
Serokê Fransayê Emmanuel Macron jî dibêje, baweriya wan bi demokrasiyê, bi taybetî jî ji demokrasiya Amerîkayê tê.
Sekreterê NATOyê Jens Stoltenberg jî dibêje, dîmenên li Kongrêsê ew matmayî kirine û divê rêz li encamên hilbijartinên demokratîk bê girtin.
Serokê Parlemena Ewrûpayê David Sasolî jî dibêje, divê rêz li dengên demokratîk bê girtin û ew di wê baweriyê de ne ku Amerîka rênimayên demokrasiyê biparêze.
Serokwezîrê Kanadayê Justen Troudo jî dibêje, Kanadî ji êrîşa li ser demokrasiyê gelek aciz in.
