Artêşa Azerbêcanê yekîneya leşkerî ya li herêma Fardinesê ya Ermanistanê topbaran kir
Wezareta Parastinê ya Ermenistanê daxuyand ku hêzên çekdar ên Komara Azerbêcanê êrişî yekîneya leşkerî ya Ermenistanê ya li bajarokê Fardinesê ya bi ser sînor ve kir. Fardines dûrî herêma Qerebaxê e.
Nûnerê Wezareta Parastinê ya Ermenistanê Artsron Hovhannesyan di civîneke çapemeniyê de ragihand ku di êrişa Komara Azerbêcanê ya li ser nuqteyên Fardinesê ya leşkerî de tu zirar negihaşt hêzên çekdar ên Ermenistanê û îşaret pê kir ku şer hê jî berdewam e.
Armenpress li gorî Artsron Hovhannesyan diyar kir ku piştî hedefgirtina firokeya bêpîlot a K. Azerbêcanê agir bi erebeyeke sivîl ket.
Berdevkê leşkerî yê artêşa Ermenistanê got piştî êrişî Wezareta Parastinê ya K. Azerbêcanê da zanîn ku hêzên çekdar ên Ermenistanê mûşek ji herêma Fardinesê avêt herêma Daşkesanê ya Azerbêcanê.
Vê sibehê Wezareta Parastinê ya Ermenistanê ragihand ku li Qerebaxê şer berdewam e. Her wiha nûnerê Wezarata Parastinê ya Ermenistanê Artsron Hovhannesyan li ser hesabê xwe yê Facebookê wiha got: "Ji çend kêliyan ve me firokeyeke din a bêpîlot xiste xwarê."
Her wiha Wezareta Parastinê ya Ermenistanê bi bîr xistibû ku şeva duşemê hêzên çekdar ên Ermenistanê li Qerebaxê 49 firokeyên bêpîlot, 4 helîkopter, balafirek, 80 tank û 82 parçeyên ji erebeyan ên artêşa Azerbêcanê rûxandine.
