Îxwaniyên piştgirê Tirkiyê li Lîbyayê êrişî wezîra karên derve ya vî welatî kir
Dema ku wezîra karên derve ya hikumeta Debîba, Necla El-Menqûş xwest ku bila çete ji axa Lîbyayê derkevin, Partiya Edalet û Avakirinê ya Îxwanan ku pêwendiya wan bi Tirkiyê re heye êrişî wê kir.
Piştî ku wezîra karên derve ya Hikumeta Yekitiya Nîştimanî Necla El-Menqûş banga betalkirina peymana bi Tirkiyê re û vekişîna hêzên wê ji Lîbyayê kir, Partiya Edalet û Avakirinê baskê siyasî yê rêxistina Îxwanan a li Lîbyayê, êrişî wê kir.
Li gorî ajansa Akî ya Îtalyayê, Necla di civînekê li gel Komîteya Karên Derve ya Parlamenta Îtalyayê de li Qesra Monte Cittorio, teqez kir ku Lîbya di heman demê de di niyeta xwe de bi israr e. Her wiha bi armanca derxistina hêzên biyanî ji Lîbyayê bang li tevahî dewletan kir ku hevkar bin.
Necla El-Menqûş got: "Ji bo Lîbyayê ev gelekî girîng e. Ji ber ku ewlehiya welatê me bi vekişîna hêzên biyanî ve girêdayî ye."
Piştre serokên Îxwanan û hêzên wê yên li Lîbyayê yên bi navê ‘Burkan El-Xadab’ wek bersiva vê bangê û ji bo parastina hebûna Tirkiyê, seferber bûn.
Partiya Edalet û Avakirinê ya Îxwanan îdia kir ku banga wezîra karên derve ji bo vekişîna hêzên Tirkiyê ji Lîbyayê "sosret e" û îdia kir ku ev hêz ji bo piştgiriya ewlehiyê û li gorî lihevkirineke fermî ya hevbeş bi dewleta Lîbyayê re li wir in û ne “çete” ne.
