Rapor - Bertekên navneteweyî li dijî êrîşên Tirkiyê ser bakûr û rojhilatê Sûriyê
Pentagonê, diyar kir ku êrişên hewayî yên Tirkiyê gefek li armanca têkoşîna li dijî DAIŞ’ê dixwe, parlimana Ewropa û Rûsyayê jî bang li Tirkiyê kir ku gavên zêde neavêje.
Li gorî nûçeya Ajansa Mezpotamyayê (MA), Dewletên Yekgirtî yên Amerîkayê (DYA), Fransa, Rûsya û Almanyayê, têkildarî êrişên artêşa Tirkiyê yên bi bialafirên şer di 20’ê mijdarê de li dijî herêmên Bakur û Rojhilatê Sûriyeyê û Herêma
Kurdistana Iraqê dane destpêkirin daxuyanî dan.
PENTAGON: "EV ÊRÎŞ JI BO TÊKOŞÎNA LI DIJÎ DAIŞ’Ê GEFEK E"
Wezareta Berevaniyê ya Amerîkayê, Pentagonê di daxuyaniya ku nivîskî da de wiha got: “Wezareta Parastinê li dijî hemû çalakiyên leşkerî ku rewşa Sûriyeyê bêîstîqrar dike û bi hikumeta Iraqê re nehatiye koordînekirin derdikeve. Ev çalakiyên wiha gefan li têkoşîna li dijî DAIŞ’ê tê dayîn dixwe.”
Wezareta Karên Derve ya Amerîkayê jî daxuyaniyeke nivîskî weşand û wiha got: “Em bang li Tirkiyê dikin ku rageşiya li Sûriyeyê kêm bike. Em li dijî çalakiyên leşkerî yên serweriya Iraqê binpê dikin û bi wê re nehatine koordînekirin derdikevin.”
RÛSYA Û FRANSAYÊ JÎ DAXUYANÎ DAN
Wezîra Karên Derve ya Fransayê Catherîna Colonnayê jî têkildarî êrişên artêşa Tirkiyê wiha got: “Ne cara ewil e ku Tirkiye êrişî dewleteke din dike. Her carê em fikarên xwe tînin ziman û banga hestiyariyê dikin. Em fikarên Tirkiyê fêm dikin lê wiha nayên çareserkirin.”
‘JI ÊRIŞAN AGAHIYA ME NÎNE’
Nûnerê Taybet ê Sûriyeyê yê Serokê Dewleta Rûsyayê Alexander Lavrentyev jî diyar kir ku artêşa Tirkiyê beriya êrişê tu agahî nedane wan û wiha got: “Em bang dikin ku pirsgirêka kurd bi rêyên aştiyane çareser bikin û Tirkiye gavên zêde neavêje.”
ALMANYA: "WINDAHIYÊN SIVÎLAN BIFIKAR IN"
Berdevkê Wezareta Karên Derve yê Almanyayê Chrîstopher Burger jî wiha axivî: “Em bang li Tirkiyê dikin ku rêzê ji hiqûqa navnetewî re bigire. Ev yek bi taybetî parastina sivîlan digire nava xwe. Û piştî êrişên Tirkiyê windahiyên sivîlan gelek bifikar in.”
"EM Tirkiyê VEDIXWÎNIN GAVEKE ZÊDE NEAVÊJE"
Seroka Parlimana Ewropayê (PE) Roberta Metsola ku di vekirina civîna Lijneya Giştî ya PE’yê kul i bajarê Strasbourg ê Fransayê hate lidarxistin de axivî, diyar kir ku êrişên artêşa Tirkiyê dibin sedemê xwîn rijandinê û wiha bang kir: “Em bang li meqamên tirk dikin ku gaveke zêde neavêjin û rêzê ji hiqûqa navnetewî re bigirin.”
