Sedema venexwendina Tirkiyê bo Civîna Demokrasiyê hat eşkerekirin
Berdevkê Koşka Spî John Kirby ragihand ku Tirkiye û Hungarya ji ber krîterên demokrasiyê bo “Civîna Demokrasiyê” ya li Amerîkayê nehatine vexwendin.
Civîna duyê ya “Lûtkeya Demokrasiyê” di navbera 28-30ê Adara 2023an de yê li Amerîkayê were lidarxistin. Amerîkayê hevpeymanên xwe yên NATOyê Tirkiye û Hungarya bo lûtkeya ku nêzîka 120 welat yê tê da beşdar bibin, venexwendin.
John Kirby derbarê venexwendina Tirkiye û Hungaryayê de dibêje, ji ber îradeya bicîhanîna krîterên demokrasiyê nîşan nedane her du welat nehatine vexwendin.
Kirby got: “Biryara lîsteya welatên tên vexwendin li gor îradeya piştgiriya saziyên demokratîk ên welatan, mafên mirov, serdestiya hiqûqê û azadiya medyayê tê dayîn. Vexwendina welatan li gor van prensîban hat wergirtin. Hemû welatên ku sala 2023ê hatine vexwendin îradeya piştgiriya mijarên lûtkeyê nîşan dane.”
