Artêşa rejîma Îsraîlê ket gundên Quneyterê
Riwangeha Mafên Mirovan a Sûriyê ragihand, Artêşa rejîma Îsraîlê li dewama dagîrkirina axa Sûriyê ket hin gundên Quneyterê û li vir jî qereqola lêgerînê danî.
Artêşa rejîma siyonîst ket bajarokê Riwêhîna yê gundewarên Quneyterê û li nêzî dibistanê qereqola kontrolê danî. Şêniyên bajarok li hemberî vê tevgerê nerazîbûn nîşan dan.
Artêşa rejîma siyonîst ji dema ketina desthilata Beşar Esed li 8 Kanûn 2024 vir ve, êrişên xwe li ser Sûriyê zêdetir kirine.
Artêşa Îsraîlê herêma navbir derbas kiriye û ketiye Çiyayê Şêx. Her wiha di 2’ê Nîsanê de jî ketiye daristana Sed a nêzî bajarê Newa yê gundewarên rojavayê Derayê.
Artêşa dagîrker a rejîma siyonîst ji destpêka salê ve 39 êriş li Sûriyê pêk anîne.
Di encama wan êrişan de 20 kes hatin kuştin, bi dehan jî birîndar bûne.
Li gor nûçeyeke din, artêşa rejîma siyonîst ku piştî bi desthilatbûna serhildayiyan hinek beşên axa Sûriyê dagir kir, îro ragehand ku hin alavên leşkerî yên artêşa Sûriyê veguhestiye Filistîna dagirbûyî.
