Nûnerê Daîmî yê Neteweyên Yekbûyî yê Sûriyê Dr. Beşar Caferî diyar kir ku dewleta Tirkiyê axa Sûriyê dagir kiriye, Tirkî li ser wir ferz kiriye, tacîz û tecawiz kiriye.

Li gorî ajansa fermî SANAyê Beşar Caferî di rûniştina lezgîn a derbarê Îdlîbê ya Konseya Ewlekariyê de bal kişandiye ser dagirkeriya dewleta Tirkiyê.

Caferî ev pirs kir, “Hebûna dewleta Tirkiyê ya li Sûriyê êrîş û çalakiya dagirkirinê ye yan na? Dewleta Tirkiyê xwest ku li cihê ku dagir kiriye Tirkî ferz bike, navê qad û kolanan biguherîne yan na? Tirkiyê berhemên me yên dîrokî dagir kir yan na?”

Caferî diyar kir ku rejîma Tirkiyê li gorî peymana Astanayê tevnegeriyaye û tevî komên ‘terorîst’ ên girêdayî xwe hewl daye hebûna xwe xurt bike û herêmê îstîsmar bike.

Caferî diyar kir ku rejîma Erdogan li Îdlîb, Helep, Lazqiyeyê ‘dixwaze rastiya terorîzmê ferz bike’ û li herêmên bakurê rojava jî girtin, kuştin, êşkence, tecawiz, dagirkirina berhemên çandinîyê, dizîya berhemên dîrokî kiriye.