Terorîstên DAIŞê êrişî artêşa Sûriyê kir: 25 kuştî û birîndar hene
Li Badiye ya Sûriyê terorîstên DAIŞê di kemînekê de karwanekî hêzên Sûriyê û Feyleqa 5 a ser bi Rûsyayê kirine armanc û di encam de 5 serbazên Sûriyê hatine kuştin û 20 serbazên din jî birîndar bûne.
Ajansa fermî ya nûçeyan a hikûmeta Sûriyê SANA îro ji zarê çavkaniyekî leşkerî ve ragihand, roja Yekşembê 2ê Çileya 2022an di encama “êrişeke mûşekî ya terorîstên DAIŞê” de bo ser karwanekî leşkerî li Badiye ya Sûriyê, 5 serbazên wî welatî hatine kuştin û 20 serbazên din jî birîndar bûne.
Li gor heman çavkaniyê, êriş di demjimêr 19:00ê êvara Yekşembiyê de li 50 kîlometriya rojhilatê Wêstgeha Sêyem a li Badiyeya Sûriyê û ji aliyê komeke “rêxistina terorîstî ya DAIŞê” ve hatiye pêkanîn.
Çavkaniyê leşkerî ji SANA re gotiye, “êriş bi teqîna topeke 23 milîmetrî pêk hat ku bû sedema mirina 5 leşkeran û birîndarbûna 20 kesên din.”
Hat ragihandin ku rewşa tendirustiya hin birîndaran jî xirab e û hitmala zêdebûna kuştiyan heye.
Çend hefteyên berê jî otobuseke leşkerên Sûriyê li derdora Şamê teqiya û di encamê de hejmarek leşker hatin kuştin.
Ev kiryarên terorîstî li Sûriyê di demekê de diqewimin ku operasyonên dijî terorê yên artêşa Sûriyê li cihên curbicur ên vî welatî dewam dikin,
Ji dema ragihandina jinavbirina DAIŞê ve di Adara 2019an de û jidestdana hemû deverên di bin kontrola wê rêxistinê de, DAIŞ ber bi Badiyeya Sûriyê ve vekişiya ku dikeve navbera parêzgehên Humsê (navendî) û Dêrezorê (rojhilat) li nêzîk sînorê bi Îraqê re ku terorîstan xwe li deverên çiyayî veşartine.
