Ji ber barana tund di hin tax û deverên Hewlêrê lehî rabû
Ji ber barana zêde û tund asta avê gelek bilind bû û li gelek tax û deverên Hewlêrê av ket nava beşeke ji xanî û dukanan.
Li Hewlêra navenda Herêma Kurdistana Iraqê îro di saetên sibehê de, ji ber barana zêde lehî rabû. Bi taybet jî li taxên Teyrawe, Şoreş, Nûseran, Gulan, Eynkawa û li cadeya 100 metrî ji ber barana zêde asta avê gelek bilind bû û av ket nava beşeke dukan û xaniyan.
Berdevkê Polîsê Hatûçûnê yê Hewlêrê Fazil Hacî ji Rûdawê ragihand, ji ber lehiyê li piraniya cade û kolanên Hewlêrê astengî çêbûn.
Serokê PDKê Mesûd Barzanî jî têkildarî mijarê peywendî li gel Parêzgarê Hewlêrê Omêd Xoşnaw pêk anî û daxwaz kir tedbîrên pêwîst bên wergirtin ji bo parastina welatiyan.
Parêzgarê Hewlêrê Omêd Xoşnaw jî ragihand, di lehiyê de ziyana canî nebûye û “hemû dam û dezgeh û aliyên peywendîdar di amadebaşiyê de ne ji bo parastina selametiya mal û canê welatiyan û her çi pêwîst be, ew dê bikin.”
