Ziyanên lehiya Hewlêrê hatin aşkerekirin
Parêzgarê Hewlêrê Omêd Xoşnaw di konferanseke rojnamevanî de ziyanên lehiya berî du rojan ya li çend tax û navçeyên Hewlêrê navenda Herêma Kurdistanê diyar kirin û ragihand, 12 kesan canê xwe ji dest dan û ziyanên madî jî bi 21 milyar Dînaran tên texmînkirin.
Parêzgarê Hewlêrê got: “Şeva17/12/2021ê, li 15 cihên Hewlêrê lehî rabû, di encamê de 12 kesan canê xwe ji dest dan. Termê 12 kesan gihîştin Pizîşka Dadwerî û radestî kesûkarên wan hatin kirin.”
Parêzgarê Hewlêrê herwiha diyar kir: “Qurbanî 3 Kurdên Hewlêrê, Kurdekî Êzidî, 3 kesên Ereb, kesekî biyanî û du kesên Nîpalî bûn. Kesekî bi navê Omêd Şamil û zarokekî bi navê Daner nebez winda ne.”
Parêzgarê Hewlêrê got: “Di lehiyê de, av derbasî 2509 xaniyan bû û ziyan gihîşt 402 xaniyên din ku yan dîwarên wan hilweşiya yan jî derî û pencereyên wan têk çûn. Ziyan gihîşt 867 otomobîlan. 153 dukan, market, kargeh, pêşangehên otomobîlan ziyan dîtin. Herwiha ziyan gihîşt hejmarek zeviyên çandiniyê û ajaldariyê.”
Omêd Xoşnaw ragihand, “Ziyanên mezin gihîştin rê û pireyan, tora eliktirîkê û avê, dibistan û avahiyên hikûmî. Herwiha ziyan gihîşt bendavên biçûk Bêstane û Kerdiz û metirsî li ser wan heye û niha tîmên me kar ji bo kêmkirina metirsiyan dikin.”
Parêzgarê Hewlêrê diyar kir: “Bi giştî, ziyanên lehiyê bi 21 milyar Dînaran tên texmînkirin.”
Parêzgarê Hewlêrê bang li Hikûmeta Federalî kir, “Bi budceya hawarhatinê, piştevaniya Herêma Kurdistanê û Hewlêrê bike, ji ber ku ew mafekî me yê yasayî ye, ji bo em ziyanpêketiyan qerebû bikin.”
