PDK'yê YNK wek berpirsa derengmayîna dayîna mûçeya fermanberên Herêma Kurdistanê zanî
Endamekî Partiya Demokrat a Kurdistana Iraqê (PDK) got: Yekîtiya Niştîmanî ya Kurdistanê (YNK) berpirsa derengketina dayîna mûçeya fermanberên Herêma Kurdistanê ye.
Îdrîs Şeban endamê PDK'yê bi gotina vêya ku YNK'yê serdestî li ser derhatên Silêmaniyê bi rêya derhatên derbasgehên sînorî, gumrik û bacê heye, got: Ev derhat di bûceya Wezareta Darayîyê ya Herêma Kurdistanê da nayên berçavgirtin û ji ber vê yekê nehevsengiyeke zêde di van derhatan da heye û hin pirsgirêk çêbûne û bûye sebeb ku Hewlêr nekare mûçeya fermanberên Herêmê di dema xwe da bide.
Hêjayî gotinê ye ku hev-tawanbarkirinên du partiyên serdest li Herêma Kurdistanê bi taybet piştî bûyera êrîşa ser balefirgeha navneteweyî ya Silêmaniyê û tawanbarbûna PDK'yê ji aliyê YNK'yê bi hebûna destê wê di vê êrîşê da û hevkariya bi Tirkiyê ra ji bo êrîşa ser balefirgeha Silêmaniyê, gurrtir bûne.
