Herêma Kurdistanê: Çiyayê Akrêya navçeya Duhokê bi agirê Newrozê ronî bû
Li Akrêya navçeya Duhokê bi boneya Cejna Newrozê îsal jî bi pêxistina meşaleyan gel bi çiyê ve hilkişiya.
Li Akrêya navçeya Duhokê ya girêdayî Herêma Kurdistana Iraqê (HKI) Cejna Newrozê hat pîrozkirin.
Bi boneya Cejna Newrozê û hatina sala nû îsal jî bi pêxistina meşaleyan bi hezaran beşdar bi çiyayên Akrê ve hilkişiyan û Newroz pîroz kirin.
Li navçeya Akrê bi dirêjiya salan êvara 20ê Adarê hezaran kes meşaleyan pêdixin û bi çiyê ve hildikişin.
Agirdadan li ser her sê çiyayên Kelê, Kelekevnê û Tîşê yên li Akrê yek ji wê kevneşopiyê ye.
Kevneşopiya ku ev 2 sal ji ber rewşa Kovîd-19ê hatibû sînordarkirin îsal bi coş û xiroşeke mezin dîsan hat geşkirin.
Akrê navçeyeke girêdayî parêzgeha Duhokê ye. Bi qasî 100 kîlometroyan dikeve rojhilatê Duhokê û herwiha bi qasî 85 kîlometroyan dikeve bakurê Hewlêrê.
Akrê di nava sê çiyayên bi navên Kelê, Kelekevnê û Tîşê de ye û xaniyên navçeyê bi şêwaza terasan yek bi ser yekê re hatine avakirin.
