Endamekî Komsyona Darayîyê ya Parlimana Iraqê got ku Hewlêr zêdeyî 100 milyard Dolarî deyndarê Bexdayê ye.

Endamê Komsyona Darayîyê ya Parlimana Iraqê Ebdulhadî Seidawî di hevpeyvîna digel Malpera Nûçan a Someryê de gotinên vê dawîyê yên Berdevkê Hikûmeta Herêma Kurdistana Iraqê Cotyar Adil ku gotîye Bexda 80 milyard Dolarî deyndarê Hewlêrê ye, ne rast in û bi bîr xist ku Hewlêr zêdeyî 100 milyard Dolarî deyndarê Bexdayê ye.

Seidawî herwiha got: Pîvanên curbicur nîşan didin ku kêmasîya bûca Iraqê ya sala 2020`ê dê zêde ji 72 tirilyon Dînarî be û ew kêmasîya ji ber çend hokaran e ku ya herîgirîng pêbendnebûna Herêma Kuridstanê li sozên xwe û pêngava Wezîrê Darayîyê yê Iraqê (Fuad Hisên) a dayîna pişkeke para Herêma Kurdistanê ye ku berovajî qanûna bûcê ya sala 2019`ê ye.

Wî Endamê Komsyona Darayîyê ya Parlimana Iraqê herwiha got: Hema tenê di dosîya niftê da divê Hikûmeta Herêma Kurdistanê zêde ji 36 milyard Dolarî bide dewleta navendî ku derhata firotina niftê ya bêyî agehdarkirina Bexdayê ye.

Wî herwiha got: Heke derhatên neniftî yên Herêma Kurdistanê ji sermalîyê bigire heta baca derîyên sînorî û balafirgehan jî digel derhatên niftê bidin ba hev, deynên Hewlêrê bo Bexdayê ji 100 milyard Dolarî zêdetir e.

Endamê Komsyona Darayîyê ya Parlimana Iraqê Ebdulhadî Seidawî di dawîyê de got: Tevî ku Herêma Kurdistanê zêde ji 600 hezar bermîlên niftê difiroşe, 250 hezar bermîl nift li nav Herêma Kurdistanê tê parvekirinê û 170 hezar bermîl jî jibo dabînkirina ceryanê tên bikaranînê ku ser hev de Herêma Kurdistanê di rojê de zêde ji milyonek bermîl niftê derdixe, lê Herêma Kurdistanê ji sala 2014`ê ve heta nika yek dînar jî nedaye xizîna dewleta fêdêral.