Diyarbûna sedema kuştina "Shinzo Abe"
Kujerê serokwezîrê berê yê Japonê di lêpirsînan de armanca xwe ya kuştinê Shinzo Abe şirove kir.
Şînzo Abe, serkirdeyê herî demdirêj ê Japonê, roja Înê (8ê Tîrmehê) derdora saet 11:30, dema ku li ber stasyona trenê ya Kintetsu axaftinek dikir, ji paş ve hat gullebarankirin û piştî ku dengê du gulleyan hat bihîstin ket erdê.
Êrîşkar Tetsuya Yamagami, 41 salî, endamê berê yê hêza deryayî ya Japonê, ji aliyê hêzên ewlehiyê ve hat girtin.
Li gor nûçeya IRIB Newsê, Di îtîrafên xwe de Yamagami diyar kir ku motîvasyona wî ya vê kuştinê têkiliyên Shinzo Abe bi "rêxistineke taybet" re bû ku kîna wî li dijî wê hebû û ev kîna wî ne ji ber meselên siyasî bû.
Polîsê Japonê behsa rêxistin û baweriyên wê nekiriye û ne diyar e ku rêxistinek weha li derve heye yan na. Hin medyayên Japonî gotin ku rêxistina ku Yamagami behsa wê kiriye rêxistinek olî bû.
Polîs hewl dide diyar bike ka Yamagami bi tena serê xwe operasyon pêk aniye an bi komek an jî çend komanan ve girêdayî ye.
Yamagami 3 salan di "Hêzên Parastina Deryayî ya Japonê" de dixebitî. Di dema wezîfeya xwe ya di Hêzên Deryayî de perwerdeya bikaranîna çek û teqemeniyan dîtiye.
Japonya yek ji wan welatan e ku cezayê îdamê lê tê sepandin. Di sê salên dawî de li vî welatî 6 kes hatin îdamkirin. Zagon cezayê îdamê ji bo kuştinê dide, lê ev ceza kêm caran ji bo kesê ku kesek kuştiye tê birîn.
