YE ferzkirina cezayên nû li Rûsyayê nîqaş dike
Seroka Komîseriya Ewropayê ragihand YE`yê ferzkirina cezayên nû li ser Rûsyayê nîqaş dike û bang kir ku çekan bi lez bidin Ukraynayê. Li gorî Volodimir Zelensky rewş li bajarê Meriupolê pir giran e.
Seroka Komîseriya Ewropayê Ursula Von Der Leyen ragihand ku Yekitiya Ewropayê (YE) nîqaşên têkildraî ferzkirina cezayên nû li dijî qada enerjiyê û banka Rûsyayê berdewam dike.
Seroka Komîseriya Ewropayê anî ziman ku divê hemû dewletên endamên YE`yê bi lez çekan radestî Ukraynayê bikin, da ku bikare parastina xwe bike.
Rêveberê Beşa Hevkariya Ewropayê ya Wezareta Karên Derve ya Rûsyayê Nîkolay Koprinets jî hişyarî da û got: "Çekên ku YE dê bişîne Kîevê, piştî demekê dê li tevahiya Ewropa bê kontrol belav bibin û dibe ku bikevin destên terorîstan."
Li aliyekî din serokê Ukraynayê Volodmir Zelensky ji ajansa nûçeyan a Okranska Pravda re axivî û got: “Li Mariupolê rewş pir giran e. Leşker û birîndarên me di dorpêçê de ne. Aloziyeke mirovî heye. Lê dîsa jî leşkerên me xwe diparêzin.”
Rûsyayê di mehên berî despêkirina şerê dijî Ukraynayê de pêşniyara dayîna garantiyên ewlehiyê dabû Amerîkayê û NATOyê û derbarê berfirekirina NATOyê li Rojhilatê Ewropayê jî hişyarê dabû, lê ev pêşniyar hat redkirin û hişyariya wê jî piştguhkirin. Ev mijarên hanê li kêleka daxwazên bi dû hev ên Ukraynayê ji bo endambûna di nav NATOyê de bûn sedem ku Serokê Rûsyayê Vladimîr Pûtîn di 24ê Sibatê de fermana êrîşa ser Ukraynayê bide.
