Alîgirên Trump derbasî nav Kongrêsa Amerîkayê bûn/ di encama gulleavêtin jinek mir
Beşek ji alîgirên Donald Trump ku dema piştrastkirina dengên Elektorala li Kongrêsa Amerîkayê çûne nav Kongrêsê li Washingtonê û her ji ber wê sedemê avahiya Kongrêsê ji aliyê polîs ve hat girtin. Berî viya Trump li nav piştgirên xwe ew teşwiq bo serhildanê kirivû.
Cigîrê Serokê Amerîkayê Mike Pence duh li Kongrêsê ragihandibû, li gor destûrê desthilata redkirina encama hilbijartinê nîne. Lê Serokê Amerîkayê Donald Trump daxwaz kiribû ji cîgirê xwe “karê xwe bike” ku ev jî weke amajeyek bo redkirina encama hilbijartinê hat dîtin.
Pence jî bersiva Trump dabû û gotibû, “Di dîroka Amerîkayê de ti cîgirekî serok ev maf nebûye.”
Kongrêsa Amerîkayê ku kombûn çêkiribû ji bo pesendkirina encama dengên Encûmena Hilbijartinê bo hilbijartina serok û cîgirê serok, di encama ketina piştgirên Trump nav Kongrêsê de naçar ma civîna xwe bi nîvî bihêle.
Herwiha Serokê Amerîkayê Donald Trump duh di Twittekê de rexneyên tund li Pence girtin û got, “Mike Pence wêrekiya encamdana wê yekê nebû ku pêwîst bû ji bo parastina welatê me û destûra me bike.”
Ji bo kontrolkirina xwepêşandanên alîgirên Trump, hejmareke berçav ji hêzên emnî ketine nav tevgerê.
Hejmarek ji endamên Kongrêsê yên li nav avahiya Kongrêsê jî ragihandin ku daxwaz ji wan hatiye kirin ku avahiyê vala bikin. Hevdem daxwaz ji rojnamevanan jî hatiye kirin ku avahiya Kongrêsê vala bikin.
Cîgirê Serokê Amerîkayê Mike Pence daxwaz dike ew tundûtûjî û wêrankariya li navçeya Kapîtol tê kirin demildest bi dawî were û dibêje, “Her kesê beşdar e pêwîst e rêz li hêzên emnî bigire û demildest avahiya Kongrêsê bicî bihêlin.”
Li gor CNNê li devera Kapîtol gulleyek bi sîngê jinekê ketiye û ew rakirin nexweşxanê lê li wir wê can da.
Kongrêsmanekê ragihand, polîs gaza rondikrêj bikar tîne ji bo belavkirina alîgirên Trump ku derbasî nav Kongrêsê bûne.
Dozgerê New Yorkê jî ragihand, ew a ku Trump dike hewla kudetayê ye.
Joe Biden, Serokê Hilbijartî yê Amerîkayê daxwaz ji Trump kir derkeve ser ekranên televîzyonê û abloqeya ser Kongrêsê bidawî bîne û herwiha tekez kir, "Tişta tê kirin êriş e li ser demokrasiyê."
Serokê Amerîkayê Donald Trump jî daxuyaniyek da û got, "hilbijartinek sexte birêve çû" û herwiha bang li alîgirên xwe kir ku vegerin malê xwe.
Li gor qedexeya derketina derve ya ku Şaredariya Waşîngtonê ji saet 18 heya 6 sibeyê diyar kiribû, di dema despêbûna vê qedexeyê alîgirên Trump neçar ma Kongrêdê biterkînin.
