Ji ber bagera Etayê 170 kes an mirin an jî winda bûn
Bagera Etayê li Amerîkaya Naverastê didome, heta niha bû sedem ku 170 kes bimirin an jî winda bibin. Bobeltaê bandor li sed hezaran kesî kir.
Bagera Etayê li 6 welatên Amerîkaya Naverastê da. Serokkomarê Guatemalayê Alejandro Gîammateî got ji ber bagerê li gundên xwecih ên Guatemalaya bakur erd şeqitiye(şimitiye) û derdora 150 kesî miriye. Gundê Queja yê li bakur Guatemalayê hema hema di bin erdê de ma.
Bagera Etayê her wiha li Panamayê 5, li Hondurasê 8, li Kosta Rîkayê 2, li Nîkaraguayê 2, li Salvadorê 1 kes kuştin. Li şeş welatan jî ziyana madî ya mezin çêbû.
Navenda Çavdêr a Bagerê ya Amerîkayê (NHC) hişyarî da û got baran ji ber bagera Etayê heta duşemê li hin herêman wê bobeltan bîne, bibe sedema ku çem rabin û erd bişeqite.
Bagera Etayê li welatên ku lê dayî bandor li ser sed hezaran kesî kir. Barana jidiyayî li Hondurasê bandor li ser 338 hezar kesan kir û hate gotin ji vê derê 2 hezar û 764 kes hatine derxistin.
